25/07/2004

Ijambo ry'AKAMINURAMUHINI rya Perezida Paul Kagame ryo kuwa 7 gicurasi 2004



AKAMINURAMUHINI: Ijambo Perezida Paul Kagame yavugiye i Kigali ku italiki 07-05-2004 igihe yafunguraga inama ya gatatu y'igihugu ku bumwe n'ubwiyunge yateranye kuva ku italiki 7 kugeza ku ya 9 gicurasi 2004



IJAMBO RYA NYAKUBAHWA PAUL KAGAME, PEREZIDA WA REPUBULIKA Y'U RWANDA-GUFUNGURA INAMA

Nyakubahwa Perezida wa Sena;

Nyakubahwa Perezida w'Umutwe w'Abadepite;

Nyakubahwa Minisitiri w'Intebe;

Nyakubahwa Perezida w'Urukiko rw'Ikirenga;

Komisiyo y'Ubumwe n'Ubwiyunge yaduteguriye Inama Nkuru;

Bashyitsi batumiwe kuva hanze y'igihugu cyacu;

Banyacyubahiro bandi bakuru mwese muri hano mu nzego zitandukanye z'Ubuyobozi bw'Igihugu cyacu;

Banyarwanda, Banyarwandakazi mwese muri hano cyangwa se batwumva;

Nagira ngo mbanze kubashimira no kubasuhuza mwese kandi mukaba mwakoze neza kwitabira inama mu rwego rw'igihugu ku Bumwe n'Ubwiyunge.

Ngira ngo iyi nama nk'uko byavuzwe ni iya gatatu ibaye nibwira kandi ko buri uko ibaye tugenda dutera intambwe mu bitekerezo mu buryo bw'aho tuganisha ubumwe n'ubwiyunge ndetse n'ibikorwa.

Iyi nama ije igihe twibukaga umunsi cyangwa se umwaka wa cumi habaye Jenoside mu Gihugu cyacu. Ndibwira ko bifitanye isano ku buryo bwinshi ariko uburyo bumwe ni uko ari umwanya wundi tubonye wo gukomeza gutekereza cyangwa se icyo nakwita "réflexion"; gukomeza kwiyumvisha impamvu u Rwanda rugira iyi Nama, impamvu u Rwanda mu bintu bimwe by'ingenzi hahora harimo ibyo tugomba gukora, hahora harimo ibijyanye n'ubumwe n'ubwiyunge impamvu cyabaye ikibazo ko duhora tuvuga ubumwe n'ubwiyunge ni iki? Hagomba kuba hari impamvu. Uko kubura k'ubumwe n'ubwiyunge, ndibwira ko ari nako kwatumye Igihugu cyacu kigira ibibazo bitari bike; harimo n'icy'ingutu kijyanye na Jenoside ndetse n'ibindi byinshi bishamikiyeho nabyo biremereye. Iyi nama rero ndibwira ko atari inama gusa iza igahita; ni inama ikwiye kuba ifite icyo idusigira mu buryo bwo gukosora ibintu bimwe na bimwe byatumye Jenoside iba, byatumye ubumwe n'ubwiyunge biba ikibazo tukaba tukiganira buri mwaka cyangwa se  tukiganira buri munsi mu nzego zitandukanye ntabwo n'ubwo bishimishije guhora tukiganira kuko ni ibigaragaza ko hari ikibazo dufite, ni ukuvuga ko hari inshingano tugomba kuba tutarujuje kugira ngo tube dufite icyo kibazo ariko ni ngombwa ko duhangana n'icyo kibazo tukagikemura inzira imwe muri ibyo ni iyingiyi y'abantu kwicara bagatekekereza hakaba hariho iyi nama duhuriramo tukagira ibyo tuganira. Ariko biba ngombwa iteka kugira ngo ushobore gukemura ikibazo ni uko ubanza ukacyumva ukajya mu mizi yacyo ukacyumva ukiha umwanya ukacyumva, ukiha n'ubushake ukacyumva kuko hagomba kuba harimo n'ubushake, hakabaho n'ubushake bwo kugira ngo igihe umaze kucyumva ugikemure. Hari byinshi rero bibuzwa n'uko hari abantu wenda batagira ubushake, hari abatagira imyumvire mizima ariko hari n'abatagira ubushake; hari n'ufite n'ubushobozi bwo kumva ariko adafite ubushake; byombi bigomba kujyana. Kugira ubushake na byo bigomba guturuka ku mpamvu z'uko ugomba kwiyumvisha ingaruka z'ikintu bigufiteho cyangwa se bifite ku Gihugu. Igihugu wari ukwiye kubonamo inyungu zawe nawe ubwawe usibye iza benshi baba bakigize. Icyabuze ni iki rero kugira ngo ibi byose bibe byarabaye. Ni ibibazo byinshi ndumva ntabirangiza hano ariko ndibuvuge iby'ingenzi uko mbibona njyewe ariko Inama yakomeza kubiganira ikagira byinshi wenda bindi ibona njye ntabonye ikaba yarenza nk'uko mbibona. Ubundi mu busanzwe mu bantu, muri sosiyete uko ibaho nta gitangaza ko abantu cyangwa se umuntu bashobora gukora amakosa. Abantu bashobora no gukora makosa aremereye cyane bamwe bagakosorwa abandi bakabihanirwa abandi bagahabwa n'umwanya wo kwikosora ariko ibintu bigakomeza bikagenda. Ariko ibyo bishoboka ari uko hariho ibitari mu nzira nyayo bikosorwa. Hari ibintu bibiri biri important bigomba kubaho mu mibereho ya sosiyete cyangwa se bitatu. Kimwe ni ubuyobozi (leadership), icya kabiri ni ideology, umurongo w'ibitekerezo, w'imyiyumvire, ubwo buyobozi buyoborana uba ari uwuhe. Icya gatatu gikubiyemo byinshi, gikubiyemo no kubahana, gikubiyemo no kubaha no kwiyubaha ni ibijyanye n'amategeko agenga abantu, amategeko ashyirwaho n'abantu kugira ngo ababere mu mibereho yabo. Icyatumye tugera kuri uyu munsi tuza tukicara hano ngo turavuga ubumwe n'ubwiyunge bw'igihugu cyacu, hari ikibazo cyashingiye kuri ibingibi uko ari bitatu maze kuvuga. Jenoside yabaye kubera ko, ntabwo ari umuntu umwe gusa wagize atya akica undi cyangwa, wenda ndaza kubona umwanya wo kubisubiraho, nsubire ku bintu bijyanye n'imfu zimaze zihora zivugwa zivangitiranya. Jenoside navuga ko hari ibintu bibiri byayigizemo uruhare: Ni ubuyobozi ni na ideology. Iyo ni Jenoside. Mu Rwanda hari ikibazo cyabaye leadership, ikibazo kiba ideology. Ni yo mpamvu twagize Jenoside muri society nyarwanda n'ubu dukwiye guhora twicuza igihe icyo ari cyo cyose. Ntabwo rero bihagije kwicara rimwe na rimwe tukavuga "abantu barapfuye: bamwe bati Jenoside; abandi bati ariko hari n'abandi bapfushije nabo bagomba kwibuka". Ni byo, ibi byose tubishyire muri contexte yabyo. Hari Jenoside tuyisobanure tuyishyire muri contexte yayo, tumenye icyatumye iba ni iki. Icya mbere cyatumye iba ni iki: leadership na ideology mbi. Ni cyo cyatumye Jenoside iba. Uko abandi bapfuye, abandi banyarwanda bagiye bapfa, ni ingaruka; inkomoko yabyo ni Jenoside. Inkomoko yabyo ni leadership yakoze Jenoside. Ni ideology, leadership yakoze Jenoside yashingiyeho ikora Jenoside. Ngira ngo hari byinshi muri consultations zagiye ziba hirya no hino abantu bavuga ndetse bakavuga bomboka. Uburyo bumwe bwo gukemura ibibazo mujye mubishyira ahagaragara, uvuge ikintu unagisobanure unagikorere defense. Njye rero niwo muco wanjye, ni ko ndibubigenze. Ibyanjye mbivugira hano. Kandi abantu bajye babiganira. Uburyo bumwe ni ukubiganira. Umuntu agatinyuka akavuga uko atekereza, ndetse akanatinyuka igihe uko atekereza kurimo imyumvire idasobanutse akanabyemera agasubira inyuma akikosora. So, Jenoside ifite inkomoko yayo na byo ndaza kongera mbigarukeho. Ariko yarabaye rubanda baricana; kwicana na byo ndabisobanura. Kwicana bya Jenoside bifite uko biteye. Kwicana bya Jenoside bifite aho biganisha; umuntu akazira icyo ari cyo. Ntabwo azira icyo yakoze, azira icyo ari cyo. Abandi benshi bapfuye ntabwo bazize icyo bari cyo; bazize bimwe mu byo bakoze. Ndavuga urugero ruri specific. Ndagenda ntanga ingero ku bintu bimwe na bimwe:

Abakoze Jenoside, kuko yabaye, barahari cyangwa ntibahari? Njye nibwira ko bariho. Nibwira ko bariho. Kuyihagarika se byagenze bite? Ntabwo kuyihagarika byavuye mu guhobera abayikoraga, abakoze Jenoside. Ntabwo byavuye mu kubasekera cyangwa kubasaba imbabazi. Abantu barabarwanyije rwose, barabarasa ku manywa y'ihangu babashyira hasi. Abayikoze rero, harimo Leta, hari n'abo Leta yakoze Jenoside yayikoresheje. Aha ndaza gusubira ku kantu kamwe. Ntabwo nshaka kuba cynical. Muri iyo ntambara twarwanye yo guhagarika Jenoside. Jenoside yo birumvikana abo yari igamije nabo barapfuye batari bake ariko n'abakoraga Jenoside benshi barapfuye. Umuntu aguye ku rugamba rw'uko yakoraga Jenoside. Njye nta mbabazi numva namusabira n'umunsi n'umwe. Because that was what they deserve. Umuntu wapfuye akora Jenoside, rwose ni cyo akwiriye. Abandi bagiye bapfa ku mpande z'abantu bakora amakosa ku giti cyabo. Ngira ngo njye ntange ubuhamya hano ku mugaragaro imbere yanyu ko twe turi correct. Abantu bakoraga amakosa nk'ayo twarabahanaga ndetse byihanukiriye bikaba nubwo hari n'abicwaga ariko bikurikije amategeko. Ndetse biza kutuviramo ikibazo cy'uko abantu, ba bandi badutegeka, za NGOS n'ibindi bavuga ngo turarengera, ngo turakabya kwica abantu bakora amakosa nk'ayo. Kubera ko badutegeka bimwe tugenda buhoro turabyoroshya. So, urumva ibyo bitandukanye n'abantu bicwa kubera icyo bari cyo; kandi bicwa n'ubuyobozi bwari bukwiye kuba bubarengera, bushyira mu gaciro ubuzima bwabo. Icyo nshaka kubitangaho urugero ni uko; rwose birasekeje ku rundi ruhande: iyo bamwe, kuko na vuba aha ndabizi, hari ambasaderi umwe, ngira ngo wenda ari hano wahagurutse ajya Arusha kujya kubwira abantu ba Tribunal ngo hari abanyarwanda bamutumye ko ngo bakoze ibindi byaha byavuyemo gupfa kw'abo bantu. Sinzi abo avuga abo aribo niba ari abakoraga Jenoside, niba ari abazize ibindi ntabwo nzi icyo yaburaniraga icyo ari cyo. Ariko ikiri interested, ni uko uwo ubivuga igihugu cye kiri ahantu kirwana abantu bapfa ariko byo bikavugwa ko ngo ubwo bapfa ni ibintu bigomba kuba. Iyo ari u Rwanda, iyo ari Afurika, u Rwanda iyo rukurikirana abakoze Jenoside bagapfa cyangwa se mu byago nkuko bagomba kuba babifite ubungubu, hakagira abandi babigwamo, abo bo ku Rwanda, Leta, abanyarwanda bakoze icyaha ! Ariko iyo babikoze bafite ibindi bakurikiye, bo ntabwo ari icyaha ! Ntabwo ari byo ! Byo bifite ukundi bisobanuka bidafite uko bisobanuka iyo ari u Rwanda cyangwa iyo ari Afurika. Iyo uzanye indege ukarasa umuntu ukora terrorism, ukwiye kwicwa kuko njye ni ko mbibona, umuntu wa terrorism ntabwo bamusaba imbabazi ngo areke kwica abantu. Ariko iyo urashe inzu irimo terrorist ukica abagore n'abana, birumvikana njye nabibaraga ko utaba ugendereye kwica abana n'abagore. Ariko byumvikana gusa iyo ari ibihugu bikize bibikoze. Iyo ari ibihugu bikennye bibikoze, uba washatse kwica abana ! Then, kubera iyo mpamvu, abanyafurika rwose n'abanyarwanda dukwiye kwanga ibintu nk'ibyo. Kandi ntawe uzabiduha ku neza kubera ko tugomba kumupfukamira cyangwa kugira gute. Tugomba guhaguruka tugaharanira uburenganzira bwacu. No muri ibi bya Jenoside, bituzanira buri munsi guhora turi muri ngo turigisha abanyarwanda reconciliation, kubana. Ubundi ikibuza abanyarwanda kubana ku buryo bigomba kuvamo isomo ni iki? Kuki tugomba kubihinduramo isomo? Ubundi se uwaturemye ko yaturemye akadushyira ahangaha ngo tubane, uwaje guhimba ibyo kutabana we ni nde? Cyangwa se inyungu zibirimo umuntu ashobora kutwereka akatubwira ati "ni izingizi" noneho twasanga zirimo tukamukurikira, ajye ahaguruka abivuge azitwereke. Ariko byose bituruka kuri politiki mbi, ku buyobozi bubi. Ideology rero icyo nahoze nshaka kuyitandukanyiriza ya Jenoside n'ibindi bishobora gukorwa kandi bifite uko bihanirwa, uko bikurikiranwa. Ni uko kuri Jenoside, umuntu azira, nabivuze, icyo ari cyo, ntabwo azira icyaha yakoze, azira icyo ari cyo. Kuba icyo ari cyo ntabwo ari icyaha. Nta muntu ukwiriye kuzira icyo ari cyo, kuko kuba icyo uri cyo ntabwo ari icyaha. Ideology mbi ituma abantu bahisha n'icyo bari cyo. Murabizi hano mu Rwanda, abantu biyitaga ibyo batari byo cyangwa se bakagomba gushakisha ibyo biyita bitari na ngombwa. Umwe akagoreka ururimi akivugisha ukuntu ngo bagire ngo aturuka mu majyaruguru, undi akagira uko agenda ngo babone ko aturuka mu majyepfo. You can't do that. Abandi ku ndangamuntu bagahimba icyo ari cyo. Ejobundi aho bibereye neza, batangiye kuvuga ngo ariko uzi ko ntari ikingiki, ibi nabikoreraga gusa Yes ! Burya nari ikingiki nabikoreye kugira ngo mbone ishuri cyangwa mpite kuri barrière. Kugira ngo ugire Igihugu giteye gityo birababaje. It is very pathetic. Kugira ngo uheshwe uburenganzira n'icyo uri cyo cyangwa se ubwimwe kubera icyo uri cyo ntabwo ari ideology ikwiye kuba iri mu Rwanda. Niba hari abandi bayikunda, nabyo sinzi ko hari ahandi. Ariko twebwe ni cyo kitubera. Ni cyo abantu batubonyemo ndetse ikibazo kindi gikomeye: mu byo dukora byose, muri izi nama tugira, mu bandi bantu dukorana nabo ikintu cya mbere cya ngombwa ni ikintu cyitwa "ownership". Abanyarwanda ntabwo bashobora kubaho ari nk'ibintu by'ibikoresho cyangwa ari nk'inka ziragiwe, bakubita ikagana aha, bakubita igasubira aha, hakaba n'izo bakubita kuzitwara ku mazi kujya ... Oya, ntabwo rwose ari byo. Ntabwo abanyarwanda ari ko tumeze. N'aho badukubita izo nkoni, mujye mubyanga mwoye gukubitwa inkoni-Yes ! Kuko ntabwo uri inka. Ndetse nakomeza uhindukire muzikubitane izo nkoni. Icyo ni cyo cya mbere; iyo umuntu atihaye agaciro ntawundi ukamuha. Hari benshi bategereje kukakwima cyangwa se gukoresha ko udafite agaciro kugira ngo babikoreshe mu nyungu zabo. Barahari bategereje, baratubonye rero abanyarwanda, basanze tutiha agaciro. Niyo mpamvu buri muntu wese, umwana uvutse ejo, umukobwa urangije, umuhungu urangije primaire akaza kwigisha abantu hano reconciliation. So, iyi nama ikwiye kudufasha twebwe abanyarwanda. Twitekerezeho, tunamenye ngo ibingibi dukora ntabwo ari ku neza y'abandi bantu, kandi nta n'ubwo tubikorera kubera ko batubwira kubikora, turabikora kuko ari ngombwa kuri twe kandi bidufitiye inyungu; nitwe bifitiye inyungu ba mbere. Abantu bose bari hano, abanyarwanda muri hano n'abandi nibwira ko mugomba kuba muri abantu bafite ubwenge, mutekereza nk'abandi baturuka ahandi aho ari ho hose. Ntabwo ubwenge buva kuba umuntu asa cyangwa irangi ry'umubiri we, ntabwo ari byo ! Imana twese yaraturemye iduha ubushobozi, tugomba kubukoresha nk'uko yabuduhaye. Ubushobozi rero ubukoresha mu nyungu, mu bintu byubaka, ntabwo ubukoresha mu gusenya, ubukoresha wubaka. Tugomba no kwanga guhinduka ntabwo turi "Guinea pigs". Ntabwo abantu badukoreraho "experiment" yo kutubwira ibyo tugomba kugerageza, ibyo tudakora, nimutagira mutya turabima ibi, nimugira mutya turabahemba. Bagatwara abantu aha ngo ni... "civil society" bakayigisha ngo uko igomba kurwanya Leta cyangwa kuyanga. Barakwigisha kurwanya Leta yawe, ingaruka zizakugarukaho nawe! Izabo ntabwo bazigisha, ntabwo bigisha umuntu uwo ari we wese kurwanya Leta yabo. Kuki se ari wowe bibereye? Ariko bikwiye kuba bitandukanye n'ikintu kiri "legitimate", kimwe cyo kuvuga ngo turashaka kubona u Rwanda rukora ibintu bizima, turashaka kubona u Rwanda rufite "institutions" za "Accountability", turashaka kubona u Rwanda rwubaka "institutions" ziri "democratic" cyangwa se zishyigikira "democracy". Ibyo ni "legitimate concern" abantu baba bafite - OK ! Ariko ugomba no kumenya "ownership". Ntabwo "democracy" nzakora ari iyawe ni iyanjye ! "Democracy" hano mu Rwanda abantu ba mbere ifitiye akamaro ni twebwe abanyarwanda, mwebwe abanyarwanda. It is not anybody else ! Usibye ko rimwe na rimwe iyo ukurikiranye ubura ukuri kwabyo. Hari ubwo bakubwira gukora ibintu, ukabikora byavamo ingaruka zitari nziza akaba ari wowe ubyishyura kandi wakoze ibyo bakubwiye ! Hari n'ubwo ubigana batakubwiye ukigana ibyo bakora bikaba bibi. Hari n'ubwo ukora ibyo bashima ahandi, wabikora ntibabishime. So, bisa nk'aho bidafite n'igisobanuro kigaragara dukwiye kuba tugenderaho. Ni yo mpamvu bigomba kugaruka kuri ba nyirabyo bakabigiramo uruhare. Ingaruka mbi akaba ari we uzirengera. Ibyiza bivuyemo ni wowe ubigiramo inyungu. Ariko n'ubundi niko bigenda; abantu nk'uko nabivuze ntabwo bakwiye kuragirwa nk'inka. Abantu bariragira. Abantu bagira ibibagenga bishyiriraho, bagira ubuyobozi, bagira abantu bagira uruhare mu bikwiye kuba bibafiteho ingaruka. Icyo twifuza kugeraho muri iyi nzira yo gukora "reflexion" ni ubumwe n'ubwiyunge n'icyabuze kugira ngo ubumwe n'ubwiyunge tube tutabufiite cyangwa se icyabuze kugira ngo igihugu kibe cyarageze muri Jenoside nk'iyo twabonye, bishingira na none ku banyarwanda bamwe, bishingiye ku buyobozi bubi, bagiriye nabi abandi. Ibyo rero ndumva ari byo mwakomeza kudufashaho mu nzira y'ubumwe n'ubwiyunge mu bitekerezo mutanga, ari abanyarwanda bavuye hanze ari abari hano; usibye ko hari igikunze kubura. Uko kubura k'ubumwe n'ubwiyunge, n'iyi Jenoside, abambere babigizemo uruhare ni abanyarwanda ariko hari n'abatari abanyarwanda babigizemo uruhare; ahubwo sinzi aho duhurira ngo badusobanurire icyatumye bagira iyo "contribution" ifite izi "consequences" zimeze zitya uyu munsi. Bo igihe tuziyunga na bo ntabwo ndakimenya ! Uwampa rwose ngo ababigizemo uruhare -ubwo ndavuga "individuals"- njye ntabwo nkunda kuvuga, "kugeneralisinga" ibintu gusa, ngo nitirire... n'udafite icyaha ngo nkimwitirire. Ariko ababigizemo uruhare ("the architects"). Wa muntu waje agahimba cyangwa se agashyiraho "ideology" ishingira wenda ku byari bisanzwe bibuze mu banyarwanda kuko muri "society" yose wenda hari ibibuze bigenda byubakwa uko "society" igenda ikura, itera imbere, abantu bagenda nyine hari byinshi biba bibuze bakabishyira mu mwanya wabyo. Ariko abaje bagahera ku byari bibuze noneho bakarushaho gukaza umurego wo kugira ngo havemo ingaruka nk'izingizi sinzi ahantu duhurira mu buryo bwa "reconcilitaion". Kuko dukwiye kugira aho duhurira... ntabwo "reconciliation" ikwiye kuba gusa hagati y'abanyarwanda. kuko kugeza n'uyu munsi ntabwo ibyo dukora tubyihariye gusa n'ibibazo bimwe tugifite n'uyu munsi bimwe ni ibyacu ibindi ni ibyo duterwa n'abandi. Rero mu buryo bwa "reconciliation" ngira ngo dukwiye kujya tugira aho duhurira, n'abo tukagira icyo tubanenga, n'ubwo... bo bahora batunenga buri munsi - ibyo nta n'icyo bitwaye ni byiza kuko batuma twimenya cyangwa se twishakamo icyo bavuga niba ari cyo ngo tugikosore ariko bakwiye kwemera tukajya tugira aho duhurira tukabereka ibibazo badutera bivamo kubura k'ubumwe n'ubwiyunge bw'igihugu cyacu. Ibyo mu byo musesengura muzashake uko ukuntu twajya tubihuza na bo umugabane wabo bakawufata bakawirengera. Ariko kuri twebwe noneho kuko ari twe twifiteho ubushobozi kandi turi hano kuko dukwiye kugira iya mbere, gufata iya mbere akaba ari twe dushaka uburyo ubwo ari bwo bwose bwo kugira ngo tubanishe abanyarwanda, dusobanure -ikintu cya mbere cyo gusobanura- abantu basobanure. Ese niba uvuga uwapfuye, yapfuye ate? Niba ... yishwe... nde? Hakavaho n'ikintu cyo ku "generalisinga", gukora "generalisation". No muri iyi minsi ishize ya "commemoration" ya Jenoside -njye nababwiye ko mbabwira uko ntekereza- hari ikintu kimwe cyabaye kandi gikunda kwanduza abanyarwanda kandi ari na cyo nyine kitugiraho ingaruka. Imvugo rimwe i"generalisinga" isa n'ishyira abantu ho icyaha nk'abantu ntabwo ari nziza. Ikibi cyabyo kandi ni uko tukiri ku rwego aho umuntu avuze ikintu iyo ari kibi nk'ibyagiye bivugwa bitari byiza numvise byari ku maradiyo na televiziyo -njye sinabibonye abantu barabimbwiye- ubwo ababibonye muzi ibyo mvuga ibyo ari byo, cyangwa ababyumvise. Iyo uhagurutse uka-"generalisinga" abantu. Now, icyo ni kibi ku ruhande rumwe. Ku rundi ruhande ikibi kirimo kandi giterwa n'imyumvire yacu itari myiza cyangwa mike ni uko n'ubyumvise atabona ko ari ikosa rya wa muntu ubivuze bisa nk'aho ari abamutumye kubivuga. Icyo ubwacyo ni ikibazo. Iyo uhagurutse uri umuntu ukavuga uti "abatutsi barakaba batya cyangwa umututsi agahaguruka ati abahutu barakaba batya", ntabwo bifasha "reconciliation" turiho tuvuga. Nta na sense bi-"makinga", "logically" nta n'icyo binavuze; kuko wananiwe gushyira ikibazo aho gikwiye kuba kiri. Wacyitiriye abantu bose. Ariko noneho niba ari Kagame uhagurutse akabivuga, kuki abantu batandeba nk'aho ari Kagame ukoze amakosa bakandebamo nk'aho ari abandi bantumye. Urumva impande zombi zikwiye kuba zikosorwa mu bwenge bw'abantu, mu mitwe h'abantu. Ntihakabeho "generalisation". Niba hari ukorewe nabi, ufudikiwe, bijye byumvikana bimenywe, uwafudikiwe, byagenze bite? Ni ukubera iyihe mpamvu? Ese niba yafudikiwe n'umunyamakosa nyine koko? Kuko muri "society" -nabivuze ngitangira- habamo abanyamakosa, habamo na "criminals", agenda akica umuntu. Niba umuntu yishe umuntu, bikurikirane umenye niba yatumwe cyangwa yabikoze ku giti cye kubera ko ari umunyabyaha. Niba ari umuntu ugiye hanze agakora "statement" atuka abantu, bikurikirane umenye niba uriya muntu ari umunyamafuti ku giti cye cyangwa se niba yatumwe ngo ajye kubivuga. Kuko nudashobora kubitandukanya, urasa n'aho ugana muri ya nzira itari nziza ya "ideology mbi"; ishaka gukurikirana umuntu icyo ari cyo kurusha icyo ashobora gukora cyangwa se icyo yakoze. Ndibwira rero ko ibi byose abantu bicaye bakabisesengura bakajya mu mizi yabyo, bishobora kudufasha gukemura ibibazo bisigaye n'ubwo hari byinshi tumaze gukemura. Kuko ndibwira ko hari byinshi bimaze gukemuka ndetse byubaka ubumwe n'ubwiyunge; ari inzego zagiye zishyirwaho, ari "constitution", ari ibiyirimo... n'ibintu bimwe byagiye bivugwa ni ibintu byagiye biganisha kubaka ubumwe n'ubwiyunge. N'ubwo hari abambwiraga ko "constitution" ari ikintu ufata abantu babiri b'abahanga bazi amategeko cyangwa umuntu wiyumvamo ubushobozi bundi wakwicara akayandika gusa abantu bakayikurikiza ntabwo ariko bimeze nta n'ubwo ari nayo nzira twafashe nta n'ubwo twayifata. Ibintu bigenga abantu, bigenga igihugu bikorwa n'abanyagihugu. Ibintu by'amategeko nka biriya n'ibindi biteye nka yo, bikorwa n'abantu babigiramo uruhare ndetse kuko ntabwo ari ibintu by'amategeko gusa, ni ibintu bijya no mu buzima bw'abantu mu buryo busanzwe mu buryo bwa politiki n'indi mibereho. Nkagira ngo rero nshimire abateguye iki kiganiro kandi nshima n'abazakigiramo uruhare ariko mbasaba, ndangiza mbasaba, n'ibi byose navuze hari n'ibindi byinshi najyaga kuvuga ariko wenda reka nere gutwara umwanya wose. Abanyarwanda tugomba guhitamo ("we must make a choice") y'icyo dushaka kuba cyo n'uko dushaka kubaho kandi biri mu bushobozi bwacu guhindura ubuzima bw'abanyarwanda, bw'igihugu cyacu, tugatera imbere. Biranashoboka kubera ko hari amasomo twavanye mu bibi byatugaragayemo dushobora gukoresha kugira ngo twubake igihugu kizaza cy'ejo. Ushaka kwireba nk'umugatolika cyangwa nk'umuporoso, cyangwa umututsi cyangwa umuhutu cyangwa iki, ibyo ajye abyambara nka costume gusa ariko ntibikagire ingaruka ku bandi banyarwanda. Tugomba kumenya guhitamo rero. Mu byo duhitamo muzabiganire hano, byongere ku byo dusanzwe tuganira cyangwa dukora cyangwa ku byo tumaze kugeraho, turebe niba tutatera imbere nk'abandi bantu tukava ku izina ribi ry'uko ubundi Igihugu cyari gikwiye kuba gifite umuco umwe gifite ururimi rumwe, cy'abantu bamwe mu by'ukuri; kujyaho bigasa nk'aho ari inyamaswa zitandukanye washyize hamwe zikaryana, ubundi ni ibintu twari dufite mu bushobozi bwacu kuba twahanagura tukajya mu nzira nziza ariko ngira ngo abantu bagiye biyambura ikintu cyo kwikunda cyane cyangwa se ubugome busenya kurusha kureba ibyubaka ngira ngo ibyinshi twabigeraho.

Nkaba rero ngira ngo ndangize ibyo navugaga nshimira buri wese, nshimira n'abana baduhaye ibitekerezo byabo, usibye ko bafite n'uburenganzira rimwe kuzahindukira bakareba inyuma ibyo twakoze bakatugaya. Kandi bafite inshingano yo kutazamera nka twe na bo bazarusheho gukora ibyiza, ibyo tutashoboye gukora bazabikore. Uwo mwana azadutwarire ubutumwa ku bandi bana, niko nababwira

Nagira ngo mbashimire mugire umunsi mwiza kandi muzagire inama nziza.




 




25-07-2004
© RWANDANET 2004



***********************************************

Subscribe:rwandanet-subscribe@yahoogroups.com


To visit your group on the web, go to:

http://groups.yahoo.com/group/rwandanet/

***********************************************









 































14:05 Écrit par 0 | Lien permanent | Commentaires (0) |  Facebook |